keskiviikko 26. syyskuuta 2018

Kändajan tark rad da kudamidä muudugi – Karjalan kiännösseminuaras on roinnuh karjalan da vepsän kiännösseminuaru

Hos meijän Päivännouzu-Suomen yliopiston Jovensuun kampuksel piettäviä kiännösseminuarua sanoimmogi allus karjalan kiännösseminuarakse, ga mennyt vuvves algajen se on olluh jo karjalan da vepsän kiännösseminuaru. Nenga rodih sendäh, gu seminuarah yhtyi kaksi vepsälästy inehmisty Petroskoilpäi. Hyö ollah Kodima-lehten toimittajat Maria Filatova da Galina Baburova. Egläi kirjuttelimmo Galinanke tulien ligakuun seminuaran dielolois. Yhteltiedy kyzyin hänel, tahtottasgo hyö panna seminuaran programman Kodima-lehteh. Programman jo valmehekse oli kiändänyh vepsäkse Petroskoin valdivonyliopiston vepsän kielen opastai Olga Žukova. Sit Galina sanoigi, gu tämän kuun lehteh jo ei ehtitä, ga muite hyö ollah kiännösseminuarah näh kirjutettu mulloi joga seminuarukerran jälles. (Sanakse, seminuarua oli kolme.) Tädä myö pahakse mielekse emmo ole tiedänyh. Ga parembihäi myöhä, migu nikonzu! Järgiezeh kyzyin Galinal niilöi kirjutuksii da täs net kuvazinnu. Lugekkua vepsäkse, kudai on karjalan da enne kaikkie livvinkarjalan lähäine sugukieli! On meijän kielis äijy yhtehisty dai eroittajuagi kohtastu. Ga kai net ozutetah kielien rikkahuttu da omaluadužuttu. Vepsän kieli on pieni varavonalaine kieli, ga se on kehitynnyh jälgivuozien aigua äijälgi. Nämmä kirjutukset hyvin tovestetah tämän dielon.



Ei kommentteja

Lähetä kommentti

Huomaa: vain tämän blogin jäsen voi lisätä kommentin.