keskiviikko 30. syyskuuta 2015

Kul’tuuru muuttujas muailmas

XVI Suomelas-ven’alaine kul’tuurufourumu oli pietty tänä vuon Petroskois, Karjalan tazavallas. Kiännä-projektan tutkijannu minul lykystih puuttuo täh tapahtumah. Korgeitazoine kolmen päivän fourumu keräi yhteh läs 400 suomelastu da ven’alastu edustajua. Fouruman avajazis oli ilo kuulla, gu prezidentutazolgi kahten muan kul’tuuruyhteisruaduo kannatetah. Kaikkih probliemoih kaččomattah suomelas-ugrilaine kul’tuuru da kielet sežo mainittih. Paiči kahtenkeskizii neuvotteluloi fouruman aigua oli pietty seiččie seminuarua, kudamis kačeltih ezimerkikse kanzanperindyö, kirjalližuttu, muuzikkua da matkailuu. Matkailun merkičysty kul’tuuran säilyttämizes oligi korostettu. 
Korgeitazozien paginoin rinnal oli pietty enämbi sadua nevvotteluu. Ičegi omas puoles kävyin Petroskoin yliopistoh, vastavuin Wikipedien aktivistoinke, Karjalan Sivistysseuran edustajienke da Petroskoin kanzallizen muzein ruadajienke. Jälgimäzikse mainitut tahtottas olla yhtevyksis da oldas kiinnostunuot kieliazientundijois. Fouruman kolmandennu päivänny kävyin Priäžän Elämä-etnokul’tuurukeskukseh, Tulemajärven vahnal zavodal, Kinnermäin da Vieljärven kylih. Puutui kaččuo omin silmin, mittuine Karjalan Kielen Kodi on. Ruattu on ylen äijy, ielpäi on vie suurembi ruado. Himoittas, gu kai tavoittehet todevuttas. Matkan hengi oli ylen lämmin. Opimmo omas puoles kannattua karjalan kielen koin toimindua. Kučuingi vieljärveläzii Kiännä-projektan kiännösseminuarah, kuduadu ruvetah tänä vuon pidämäh Jovensuus.
Fourumu on pietty da myö jatkammo omii ruadoloi. Mieles on Nuoren Karjalan tulii aigu. Tahtozin, gu jatkos kul’tuurufourumas enämbi huomivuo kiinnitettäs vähembistökielien probliemoih, kielien nygytilah da elvytykseh, sendäh gu kielet on vältämätöi oza kul’tuurua. Yksi teemuseminuarois vois olla omistettu kielile. Kul’tuuruprojektan rahoitukseh vois hyvin ližätä ”kielipuoli”. Kehoittazin kul’tuurualan ruadajii ezimerkikse luadimah projektoin sivuloi kui virallizil kielil, mugagi vähembistökielil, ezimerkikse karjalakse. Muga kielet tuldas nägyvih, kehityttäs, kiändäjil olis ruaduo. 
Kaikile järjestäjile passibot!

#koneensäätiö #rohkeatekijä #kultforum #2015

2 kommenttia:

  1. Puaksuh ongi mugalei: kul'tuuran dielolois paistes unohtetah kielidielot, libo niilöile annetah vaigu vähäzen huomivuo. Muga eule vai Ven'al, sežo tiäl Suomes erähät luajitah nenga.

    Iče en sua ellendiä mindäh ezimerkikse Karjalazen Kul'tuuran Eiständyfondan
    ( https://www.kkes.fi/etusivu/ ) nettusivut ollah vai suomekse. Sama tilandeh Karjalan liitonke ( http://www.karjalanliitto.fi/ ) - heijän sivut ollah suomen lizäkse ruočin, anglien da ven'an kielil, karjalakse ei nivouse...

    Tiettäväine suuri vuitti, selvy enimistö Suomen karjalazis on suomenkielizii ristikanzoi, ga olisgo muailman jygevin ruado kiändiä nämmä saitat sežo karjalakse da kirjuttua bokkah ku net lövvytäh karjalan kielelgi? Paginanalazennu taki ollah karjalazet nettusivut...

    VastaaPoista
    Vastaukset
    1. Yhtenjyttyine tilandeh on Karjalazen nuorižoliiton saital (http://www.karjalainennuorisoliitto.fi/). Suomen ližäkse löydyy "In English" da "På svenska", karjalakse ei nimidä lövvy.

      Poista